Батлан хамгаалахын их сургуулийн спорт заалны нээлтийн ажиллагаа 2011 оны 10 дугаар сарын 28-ны өдөр боллоо. Нээлтийн ажиллагаанд БХИС-ийн захирал бригадын генерал З.Болдбаатар, БХИС-ийн ЦАХҮ эрхэлсэн дэд захирал, БХИС-ийн спортын зөвлөлийн дарга хурандаа С.Пүрэвдорж нар оролцсон бөгөөд нээлтийн ажиллагаанд зориулан байнгын бие бүрэлдэхүүний дунд зохиогдсон сагсан бөмбөгийн тэмцээнийг үзэж сонирхлоо. Тэмцээнд нийт 9 багийн 100 гаруй тамирчид оролцсоноос  эрэгтэй төрөлд Ахлагчийн сургууль 1-р байр, Цэргийн инженерийн сургууль 2-р байр, СБЗА-ны баг тамирчид 3-р  байр харин эмэгтэй төрөлд Цэргийн инженерийн сургууль 1-р байр, Цэргийн командын сургууль 2-р байр, СБЗА-ны баг тамирчид 3-р байр эзэлсэн байна. Багийн дүнгээр Цэргийн инженерийн сургууль 1-р байр, СБЗА-ны баг 2-р байр харин Цэргийн командын сургууль 3-р байр эзэлжээ.

Батлан хамгаалахын их сургуулийн Цэргийн командын сургуулийн Ерөнхий цэргийн тэнхимд ШШГЕГ-ын алба хаагчид анх удаа сургагч ахлагчийн сургалтад хамрагдлаа. Энэ төрлийн сургалт нь ШШГЕГ-ын хэмжээнд анх удаа явагдаж буй бөгөөд нийт 36 алба хаагч 2011 оны 10.17-11.3 өдрүүдэд тус дамжаанд хамрагдан амжилттай суралцсан байна. Энэхүү дамжааны төгсөлтийн ажиллагаанд БХИС-ийн захирал бригадын генерал З.Болдбаатар, БХИС-ийн ЦАХҮ эрхэлсэн дэд захирал хурандаа С.Пүрэвдорж болон ШШГЕГ-ын дэд дарга нар оролцон төгсөгчдөд батламж гардуулсан байна.

БНСУ-ын агаарын цэргийн хүчний урилгаар БХИС-ийн АДХЦ-ийн тэнхимийн багш хошууч Г.Лхагва, Ерөнхий цэргийн тэнхимийн багш ахмад П.Отгонтулга, АДХЦ-ийн тэнхимийн 5-р дамжааны сонсогч Ц.Энхмандал, 3-р дамжааны сонсогч Ц.Далайхүү нар 2011 оны 10.30-11.6-ний өдрүүдэд БНСУ-д танилцах аялал хийж байна. Уг аялалын үер манай багш, сонсогчид агаарын цэргийн хүчний шоу үзүүлбэр сонирхон тус улсын цэргийн сургуулийн үйл ажиллагаатай танилцах юм байна.